• நுழைவாயிலில்
  • என் அகம்
  • கட்டுரைகள்
  • இலக்கியங்கள்
  • வாழ்த்துக்கள்
  • விமர்சனங்கள்
  • சிறப்பு
  • வணக்கம் எனது படைப்புக்கள் உங்களை வரவேற்கிறது . வாசித்து உங்கள் எண்ணங்களை இதில் பதிவிடுங்கள்

    செவ்வாய், 21 ஜனவரி, 2020

    இளையோர் தமிழ் சங்கம் நடத்திய தைப்பொங்கல் 2020



                                          கலாசாரக் காப்பாளர்களாக இளையோர்

    நம் வாழ்வின் அடையாளங்களை ஏதோ வழியில் வாழ்ந்த இடத்தில் நாம் விட்டுச்செல்ல வேண்டிய அவசியம் இருக்கின்றது. புலம்பெயர்ந்த தமிழன் தன் மொழி, கலாசாரம், பண்பாடு என்பவற்றை தான் வாழும் பகுதிகளில் நிலைநாட்டிக் கொண்டே வருகின்றான். அவர்களின் வாழ்வுக்குப் பின் எவ்வாறு எம்முடைய கலாசார கோட்பாடுகளும் பண்பாட்டு அடையாளங்களும் பேணிப் பாதுகாக்கப்படும் என்னும் கேள்விக்குறி ஒவ்வொரு மனங்களுக்குள்ளும் மறைந்திருக்கின்றது. ஆனால், அக்கேள்விக்குறிக்கு விடை காணும் வகையில் 18.01.2020 அன்று எசன் நகரில்  Getrudissaal, Rott Str 36 என்னும் முகவரியில் மண்டபம் நிறைந்த பார்வையாளர்களுடன் மிகச்சிறப்பாக இளையோர் தமிழ்ச் சங்கம் பொங்கல் விழாவை நடத்தியிருந்தனர். 

    ஆரம்ப நிகழ்வாக எமது பாரம்பரிய முறைப்படி பொங்கல் பானை அடுப்பில் வைத்து பொங்கப்பட்டது. வளருகின்ற சிறுவர்கள் அதன் படிமுறைகளை பார்த்து இரசித்து உள்வாங்கும் படியாக இந்நிகழ்வு அமைந்திருந்தது. பொங்கிய பொங்கலின் இனிமையை வந்திருந்த விருந்தாளிகள் அனைவருக்கும் பகிர்ந்தளித்து இளையோர் மகிழ்ச்சியைத் தெரிவித்தனர். 

    அதனைத் தொடர்ந்து மேடை நிகழ்வுகள் ஆரம்பமாகின. இந்த நிகழ்ச்சிக்கு பலர் அனுசரணை வழங்கியிருந்தனர். பிரதம விருந்தினராக எசன் நகரமுதல்வர் Herr. Thomas Kufen அவர்கள் கலந்து சிறப்பித்தார். சிறப்பு விருந்தினராக இலங்கையில் இருந்து சிறு வயதிலே யேர்மனி வந்து படித்து இருதய சத்திரசிகிச்சை டாக்டராகப் பதவி வகிக்கும் இளைஞர்  திரு. உமேஸ்வரன் அருணகிரிநாதர் அவர்கள் கலந்து சிறப்பித்தார். எப்படித்தான் ஒரு மரத்தைக் கொண்டு வந்து வேறு ஒரு இடத்தில் நட்டாலும் அதன் வேரின் தன்மைகள் மாறாது. வளருகின்ற இடத்திலிருந்து  பயன்களைப் பெற்று புதிய வேர்கள் வரலாம் அதன் அடிப்படைத் தன்மையில் மாற்றத்தைக் காணமுடியாது என்ற கருத்துப்பட்ட வார்த்தைகள் சிறப்பாக அமைந்திருந்தன. 

    அறிவுப்புக்கள் அறிவுபூர்வமாக அமைந்திருந்தன. 5 இளையவர்கள் அறிவிப்பைச் செய்திருந்தார்கள். இது குறைக்கப்படலாம் என்று நினைத்தேன். மேடை சிறிதாக இருந்த காரணத்தால் ஒலி அமைப்புக்களை முன்னமே ஒழுங்குபடுத்த முடியவில்லை. காரணம் நடனம் ஆடுகின்ற இளையவர்களுக்கு அது இடைஞ்சலைத் தரும் என்பதைப் புரிந்து கொண்டேன். நிகழ்ச்சிகள் அத்தனையும் சிறப்பாக இருந்தன. 

    மேடைநிகழ்வுகளில் கலாசார பண்பாட்டு நிகழ்வுகளையும் சினிமாவையும் ஒன்றாகக் கலக்காது இடைவேளைக்கு முன்னுள்ள நிகழ்வுகள் அனைத்தும் எமது பாரம்பரிய நடனங்களான கோலாட்டம், கும்மி, காவடி, கரகாட்டம் போன்றனவும், பரதநாட்டிய நிகழ்வுகள், வீணைஇசை, கர்நாடக இசை போன்றனவும் இடைவேளியின் பின் சினிமா நடனங்கள் பாடல்கள், Keybord, Violin போன்றனவும் இடம்பெற்றன. அற்புதமான இந்நிகழ்வுகளின் சிறுவர்களின் நடனங்களைக் காணும்போது எமது கலைகள் காலம் கடந்தும் புலம்பெயர் மண்ணில் அடையாளங்காட்டும் என்பதை அறியக்கூடியதாக இருந்தது. 

    பெரியவர்கள் ஒழுங்கு செய்து நடத்துகின்ற நிகழ்வுகளில் கூட அவதானிக்கப்படாத ஆடை விடயங்கள், மனிதப் பண்புகளின் சீர்கேடுகள் போன்றவை இளையவர்கள் முன்னின்று நடத்திய இந்த நிகழ்வில் ஒரு துளி அளவுகூட இடம்பெறவில்லை. அனைத்தும் அவதானிக்கப்பட்டு ஒழுக்கமான ஆடைகள், ஒழுக்கத்தைப் பிரதிபலிக்கும் நிகழச்சிகள் என்பவற்றை நடத்தியிருந்ததைப் பார்க்கும் போது இளைய சமுதாயம் என் முன்னே உயர்ந்து நிற்கின்றார்கள். இதனை முக்கியமாகக் குறிப்பிட்டுச் சொல்ல வேண்டியது அவசியமாகும். 

    தம்முடைய சங்க உறுப்பினர்களை மேடைக்கு அழைக்கும் போது அவர்கள் சங்கத்தில் என்ன பதவி வகிக்கின்றார்கள் என்பதை அறிவிப்புச் செய்யாமல் உறுப்பினர்கள் என்று அழைத்து அவர்களை பரிசில்கள் வழங்கச் செய்த பண்பு பெரியவர்களைத் தலைகுனியச் செய்தது. பதவியில் எதுவும் இல்லை. செயலிலேயே பெருமை அடங்கியிருக்கின்றது என்னும் உண்மையை எடுத்துக்காட்டியிருந்தார்கள். 

    நேரம் கடந்து நிகழ்ச்சிகள் நடைபெற்றபோதும் களைப்பு எதனையும் இளையோர் தமிழ் சங்கத்தினரோ நிகழ்ச்சியில் கலந்து கொண்ட சிறுவர்களோ, இளையவர்களோ காட்டவில்லை என்பது மகிழ்ச்சியைத் தந்தது.

    இவற்றையெல்லாம் தாண்டி குறைகள் தென்பட்டிருந்தால், அக்குறைகளை தனிப்பட்ட முறையில் அவர்களிடம் எடுத்துரைத்து அவர்களைச் சரியான முறையில் வழிப்படுத்த வேண்டிய பொறுப்பு ஒவ்வொரு பெரியவர்களுக்கும் இருக்கின்றது. அவ்வாறு குறைகளைக் கண்டிருந்தால், அவற்றை உரியவர்களிடம் எடுத்துரைக்கலாம். நிறைகளை வெளியுலகத்திற்குத் தெரியப்படுத்தலாம். அதுவே சமூகத்தைத் திருத்துவதற்கும் இளையவர்களைச் சரியான பாதைக்குக் கொண்டு செல்வதற்கும் உரிய வழிமுறையாகும்.

    செவ்வாய், 14 ஜனவரி, 2020

    சூரியப் பொங்கல்

                    

                       

    தினமும் அரிசிச் சோறை உண்ணுகின்ற நாம், அதனை எமக்கு அளிக்கின்ற விவசாயிகளைப் போற்றாது இருப்பது நன்றி மறந்த செயலாகும். நாளெல்லாம் எமக்காக உழைப்பவர்கள். தாம் பெற்ற முதல் நெல்லை சூரியனுக்குப் பொங்கலாகப் படைத்து கொண்டாடுகின்றார்கள். விவசாயத்திற்கு உதவுகின்ற மாட்டுக்கு அடுத்த நாள் மாட்டுப் பொங்கல் வைக்கின்றார்கள். அதேபோல் இந்த உலகம் உய்ய எதனையுமே எதிர்பார்க்காது எம்மைப் பாதுகாக்கின்ற சூரியனுக்கு நன்றி சொல்வதற்காகவும், விவசாயிகளைப் போற்றுவதற்காகவும் பொங்கல் விழாவைக் கொண்டாடுகின்றோம். உழுதுண்டு வாழ்வாரே வாழ்வார் மற்றெல்லாம் தொழுதுண்டு பின் செல்பவர் என்றார் வள்ளுவப் பெருந்தகை. இவ் உழவுத் தொழிலுக்கு முக்கிய காரண கர்த்தா சூரியன் அவர் யார்? அவருடைய குணநலங்கள் என்ன என்பதையும் இன்றைய நாளில் சிந்திப்போம்.

    பூமியிலே உயிர்கள் வாழ்வதற்கான ஆற்றலைத் தருவது சூரியனே. ஒவ்வொரு நட்சத்திரங்களும் ஒவ்வொரு சூரியனே. வானவெளியானது யாதுமற்ற ஒரு வெளியாகவே இருந்தது. ஆயிரத்து நானூறு கோடி ஆண்டுகளுக்கு முன் திடீரென ஒரு எரிமலை போன்ற ஒன்று வெடித்துச் சிதறியதாம். அவ்வாறு சிதறியவைதான் நட்சத்திரங்கள் என்று சொல்லப்படும் சூரியன்கள் என வானவியலாளர்கள் கூறுகின்றார்கள். அதன்பின் 100 கோடி ஆண்டுகள் கழித்து சூரியனில் இருந்து வெடித்துச் சிதறியனவே கோள்கள். இந்தக் கோள்கள் ஒரு ஈர்ப்பு மூலம் சுற்றுகின்றன. சூரியனுக்கும் பூமிக்கும் இடையிலுள்ள தூரம் எவ்வளவு என்று பார்த்தால் 5,600 ஒளி ஆண்டுகள் என்கின்றார்கள். ஒரு ஒளி ஆண்டு என்றால், ஒளி செல்லுகின்ற தூரம். ஒளியானது ஒரு வருடத்தில் 8 இலட்சம் கோடி கிலோ மீற்றர் தூரம் செல்லக் கூடியது. இதேபோல் 5,600 ஒளி ஆண்டுகள் பூமிக்கும் சூரியனுக்கும் இடையில் உள்ள தூரமாகின்றது. இவ்வளவு தூரம் தாண்டி எம்மை அடைகின்ற சூரியக் கதிர்களையே எம்மால் தாங்க முடியாது உள்ளது. எப்படி எம்மால் நெருங்க முடியும். சூரியன் இல்லாமல் எம்மால் மட்டுமல்ல எந்த உயிரினங்களாலும் உயிர் வாழ முடியாது. 

    இயற்கையின் அற்புதமே சூரியன். பூமியின் ஈர்ப்பு சக்தி போலவே சூரியனிலும் ஈர்ப்பு சக்தி இருக்கின்றது. அது பூமியின் ஈர்ப்பு சக்தியைப் போல 28 மடங்கு அதிகமானது. கிரகங்களை அப்படியே இழுத்து எரித்து பஸ்மமாக்கிவிடும். ஆனால், சூரியமண்டலத்திலுள்ள எல்லாவற்றையும் சூரியன் இந்த ஈர்ப்பு சக்தியால் கட்டுப்படுத்தி வைத்திருக்கின்றது. 

    சூரியகிரகம் இல்லாது எம்மால் வாழவும் முடியாது. அதேபோல் அதனை எம்மால் நெருங்கவும் முடியாது. எட்ட நின்று தன் தீக் கரங்களில் இருந்து எம்மையும் உயிர்களையும் பாதுகாக்கும் சூரியக் கடவுளுக்கு நாம் நன்றி சொல்லி மகிழ்வோம். நீங்கள் நன்றி சொல்லாவிட்டால் சூரியன்  உதிக்க மாட்டாரா? ஒவ்வொரு நாளும் சூரியநமஸ்காரம் செய்கின்றோம்தானே! என்று பலர் கூறுவது கேட்கின்றது. ஆனால், அன்னையர் தினம் என்று ஒருநாள், மகளிர் தினம் என்று ஒருநாள், காதலர் தினம் என்று ஒருநாள், கோயில்களில் திருவிழா என்று நாட்கள் எல்லாம் நடத்துகின்றபோது அவர் இல்லையென்றால், நாம் இல்லை என்று ஒருவர் இருக்கும் போது அவரை மனதார நினைத்துக் கொண்டாடுவது பெரிய விடயமாகவே நான் கருதுகின்றேன். அதைவிட விவசாயிகள் இனித்திருக்கும் நாள் இந்நாள் என்பது உண்மையே. எனவே அரிசிப் பொங்கலிட்டு மகிழ்ந்தின்புறுவோம். இன்றைய நாளைத் தைத்திருநாளாக கொண்டாடி மகிழ்வோம்.



    பாசத்தைப் பரிசீலனை செய்வீர்

      காலத்தைச் சிறைப்பிடித்து கணனிக்குள் செலுத்தினாய்  நேரமறியா துன்காலத்தை வீணாகத் தொலைத்தாய்  தீராத விளையாட்டில் நோயாகிப் போனாய்  நிம...